周年大選黑箱作業事件傳媒報道－2013年2月1日

港大轉莊鬧違憲風波 選委會主席自行祝聖

《星島日報》1-2-2013 每日雜誌 A16
來源連結

踏入新一年，各大院校學生會陸續交棒，但港大（見圖）評議會月初討論周年大選安排，傳出散會後自行留低宣布「復會」，企圖廢舊立新，被質疑委任自己友做主席，實行「自行祝聖」。有人翻查學生會憲章，選委會主席係學生會常務秘書的憲制職權，而且召開評議會會議最少要有二十四小時通知，選舉過程被指有明顯違憲之嫌。有同學近日大字報炮轟自封「選委會主席」的徐莉嘉「涉嫌偽造文書，企圖操控選舉」，結果有關程序昨日終於被評議會裁定為違憲及無效。

港大校內人士解畫，指今次選舉係幾十年來，唯一有兩個內閣「齊莊互撼」，共有四十六人參選。其中一個內閣「弘曦」的重要成員周嘉發，在被指為社民連黨員後，近日突然宣布「退黨」。另外兩名成員自報是「學民思潮」成員。至於背後支持弘曦閣的工黨副秘書長、參加過「五區公投」的郭永健，以及讀了八年都未畢業的社民連黨員徐傑生。

今次選舉搞到咁激烈，據講昨晨會議完結後，竟然出現幾十人堵塞薄扶林道，最後竟然勞煩警察出動，才恢復交通。有同學話，學生會選舉有競爭係好事，但搞到懷疑違憲、堵塞馬路，再咁落去，最高學府會不會變成激進政治場地呢？